Ümumdünya Güləş Federasiyası (UWW) verdiyi qərarla dünya gündəminə düşüb. Pressa xəbər verir ki, beynəlxalq federasiya bir-biri ilə qarşılaşan iki idmançıya da qızıl medal verib.
Belə ki, bu ilin sentyabrında Serbiyanın paytaxtı Belqradda keçirilən güləş üzrə dünya çempionatında 87 kq çəki dərəcəsində keçirilən finalda türkiyəli Ali Cengiz macarıstanlı David Loşontsiya 8:7 hesabı ilə qalib gəlib.
Lakin görüşün nəticəsindən narazı qalan Macarıstan Güləş Federasiyası finalla bağlı şikayə edib. Beynəlxalq federasiya şikayəti qəbul edərək görüşlə bağlı qərarı müzakirəyə çıxarıb və videoyazı yenidən izlənilib. UWW rəsmiləri belə qərara gəlib ki, hakim ciddi səhvə yol verib.
Nəticədə onlar macarıstanlı idmançını da dünya çempionu elan edib.
Bu qərar isə dünya güləş tarixinə düşüb. İndiyə qədər heç bir görüşdə bu cür qərar qəbul edilməyib.